НИЙГМИЙН ҮЙЛЧИЛГЭЭ

Сургуулийн зүгээс суралцагчдын эрх ашгийг хамгаалах, хөгжил төлөвшил, оролцоог хангах олон төрлийн үйл ажиллагааг төлөвлөн хэрэгжүүлэхээс гадна гэр-сургууль-гэр маршрутын аюулгүй байдал, гэмт хэрэг зөрчлөөс урьдчилан сэргийлэх арга хэмжээнд анхаарал хандуулан ажилладаг бөгөөд хичээлийн жилд 1 удаа судалгаа аван, судалгаанаас гарсан үр дүнд үндэслэн зарим ажлуудыг сайжруулан шинэчилж ирсэн. Тухайлбал:

• 2020-2021 оны хичээлийн жилд суралцагчийн хөгжил, төлөвшлийг дэмжих, хүмүүжлийн ач холбогдол бүхий уулзалт, сургалт, өдөрлөг 11 удаагийн үйл ажиллагаагаар дамжуулан хэрэгжүүлсэн бол мэргэжил, ерөнхий эрдмийн нийт 11 олимпиад зохион байгуулсан байна. Тухайн хичээлийн жилд төлөвлөгдсөн суралцагчид чиглэсэн 49 ажил төлөвлөснөөс 26-г нь бүрэн хэрэгжүүлж, 3316 оюутан, суралцагчдыг хамруулсан байна. 2021-2022 оны хичээлийн жилд суралцагчдын хөгжил, төлөвшлийг дэмжих 7 төрлийн үйл ажиллагаа, 12 удаагийн мэргэжлийн болон ерөнхий эрдмийн олимпиад, уралдаан тэмцээн зохион байгуулсан бөгөөд 56 ажил төлөвлөснөөр 51 ажлыг хийж хэрэгжүүлсэн давхардсан тоогоор 5770 оюутан, суралцагчдын оролцоог ханган ажилласан байна.  2022-2023 оны хичээлийн жилд суралцагчдын хөгжил, төлөвшилд чиглэсэн 3, мэргэжлийн болон ерөнхий эрдмийн нийт 14 олимпиад зохион байгуулж, төлөвлөсөн нийт 48 ажлаас 45 ажлыг хийж гүйцэтгэсэн, 4175 оюутан, суралцагчийг хамруулсан байна. 2023-2024 оны хичээлийн жилд суралцагчдын хөгжил төлөвшил, хүмүүжлийг дэмжихэд чиглэсэн 12 үйл ажиллагаа, мэргэжлийн болон ерөнхий эрдмийн нийт 11 олимпиад зохион байгуулсан бөгөөд тус хичээлийн жилд 30 ажил төлөвлөгдсөнөөс 29 ажлыг хийж гүйцэтгэн нийт 3007 оюутан, суралцагчдыг оролцуулсан байна.
• 2023-2024 оны хичээлийн жилд сургуулийн дотор, гадна талбайд байрлах камержуулалтын байдалд дотоодын үнэлгээ хийж, нийт 124 ширхэг камерыг бүрэн ажиллагаатай болгох ажлыг үе шаттай зохион байгуулж байна. Мөн шинээр элсэгч нийт 481 суралцагчид сарын 44 эрх бүхий оюутны автобусны карт, номын сангийн бар код бүхий суралцагчийн үнэмлэх 560 ширхгийг захиалан гаргаж өгсөн байна.
• Бүтэн өнчин, хөгжлийн бэрхшээлтэй, амьжиргааны түвшнээс доогуур орлоготой өрхийн суралцагчдыг дэмжиж 2019-2024 онд сургуулийн зүгээс 185 суралцагчид сургалтын төлбөрийн тэтгэлэг олгосон байна.
• Сургуулийн оюутны байранд сүүлийн 5 жилд давхардсан тоогоор 243 суралцагч амьдарсан бөгөөд жилд дунджаар 49 суралцагчид оюутны байрын үйлчилгээг үзүүлсэн байна. Үүнээс 26% нь эмэгтэй суралцагчид байна.

ОЮУТНЫ ҮНЭМЛЭХ

Оюутны цахим үнэмлэх захиалахад 3x4 хэмжээтэй 413*531 нягтралтай (pixel) зургийг файлаар өгөх шаардлагатай. Шинэ элсэгчдэд тушаалыг үндэслэн ОХХ-ээс олгоно.. Оюутны үнэмлэх нь ТТДС, ТТПК-ийн оюутан мөн эсэхийг батлах үндсэн бичиг баримт мөн.

ОЮУТНЫ ЦАХИМ ҮНЭМЛЭХИЙГ АШИГЛАХ БОЛОМЖУУД

• Номын сангаар үйлчлүүлэх
• Нийтийн тээврийн хөнгөлөлттэй үнээр зорчих карт захиалах
• Сургуулийн эмчид үзүүлэх, зөвлөгөө авах
• Сургуульдаа шатлан суралцах
• Оюутны байранд орох хүсэлт гаргах
• Архивын лавлагаа, тодорхойлолт авах

ОЮУТНЫ АВТОБУСНЫ КАРТ

УБ СМАРТ КАРТ компанийн мэдээлэл:

1. ТТДС -ийн оюутан болон 18-аас дээш насны /ТБ -ын/ суралцагчид и-монголиа системээр эсвэл Нийслэлийн нэг цэгийн үйлчилгээний төвүүдэд захиалга өгнө
2. ТТПК -ийн суралцагчид буюу 18 насанд хүрээгүй суралцагчид сургуулиараа дамжуулан захиалах тул Ангийн зөвлөх багшдаа бүртгүүлнэ үү
3. Урьд нь карт авч байсан, сунгуулах хүсэлтэй оюутан, суралцагчид U money карт цэнэглэх гэрээт цэгүүдэд сунгуулах боломжтой.

Оюутны автобусны картыг бакалаврын хөтөлбөрийн өдрийн ангийн 1-ээс 4-р курсэд суралцаж буй бүх оюутан ямар нэгэн хязгаарлалтгүйгээр захиалах боломжтой бөгөөд оюутны картаа авсан тохиолдолд сургуулиа төгсөх хүртлээ ажлын өдрүүдэд сар бүр 44 удаа нийтийн тээврээр үнэ төлбөргүй зорчих боломжтой болох юм.

Оюутны автобусны картыг хэрхэн захиалах тухай: E-Mongolia гар утасны аппликэйшн болон www.e-mongolia.mn порталаар нэвтэрч “Оюутны автобусны карт захиалах” үйлчилгээг сонгон картаа захиална.

a.    Захиалах үед оюутны мэдээлэл бүртгэгдээгүй тохиолдолд сургуулийнхаа сургалтын албанд хандан мэдээллээ оруулсны дараа захиалгаа дахин хийнэ.

b.    Харин таны мэдээлэл зөрүүтэй байна гэсэн тохиолдолд сургуулийнхаа сургалтын албанд хандан “Оюутны мэдээллийн сан”-д оруулсан мэдээллээ устгуулан дахин шинээр оруулсны дараа оюутны картаа дахин захиалах боломжтой болох юм. 

Оюутны картаа www.e-mongolia.mn порталаар нэвтэрч амжилттай захиалсны дараа карт нь танай сургуулийн оюутны холбоо болон сургалтын албан дээр 3 хоногийн дотор хүргэгдэх тул сургуулийн оюутны холбоо болон сургалтын албанаасаа авна.

Автобусны хөнгөлөлттэй картыг өмнө нь авч байсан буюу картаа хаяж гээгдүүлсэн тохиолдолд картаа дахин захиалахдаа Нийслэлийн үйлчилгээний нэгдсэн төвүүдэд хандан дахин авах боломжтой.

Өмнөх жилүүдэд оюутны карт авсан оюутнууд картын зорчилтын эрх нь 22 байгаа тохиолдолд Umoney карт борлуулах, цэнэглэх гэрээт цэгүүдэд очиж оюутны картын зорчилтын эрхээ 44 болгон идэвхжүүлэн ашиглах юм. 

Оюутны автобусны картаа захиалаад авч чадаагүй удсан, авсан картаараа нийтийн тээврээр зорчиход асуудал гарсан тохиолдолд 70151289 дугаарт хандан шалгуулах боломжтой болно.

Улаанбаатар смарт карт ХХК

ОЮУТЫН ЦЭРЭГ ХӨТӨЛБӨРИЙН ТАНИЛЦУУЛГА

Монгол Улсын их, дээд сургуулийн оюутнуудыг суралцах хугацаанд нь цэргийн эрчимжсэн сургалттай тусгай хөтөлбөрөөр цэргийн бэлтгэл сургалтад хамруулан цэргийн алба хаалгах бололцоог бүрдүүлэх, эх орноо батлан хамгаалах, төрийн алба хаших, эрүүл чийрэг, бие бялдар, сэтгэл зүйн болон цэргийн бэлтгэлтэй залуусын тоог нэмэгдүүлж, улс орныг батлан хамгаалах чадавхийг сайжруулан дайчилгааны бэлтгэл үүрэгтний нөөцийг хангахад энэхүү хөтөлбөрийн зорилго оршино.

Оюутан цэрэг хөтөлбөрийн холбогдох дүрэм журмыг /Энд дарж/  дэлгэрүүлж үзнэ үү.

Бүртгүүлэхэд тавигдах шаардлага:

• 18 наснаас 25 насны бакалаврын түвшний өдрийн ангийн 1-р курсд суралцдаг байх
•  “Оюутан-цэрэг” хөтөлбөрт хамрагдах сонирхолтой байх
• 4 дүгээр сараас эхлэн хоёр кредитийн цэргийн ерөнхий бэлтгэл хичээлийг сонгон суралцаж төлбөр төлөх боломжтой байх

Оюутан цэрэг хөтөлбөрийн бүртгэл явагдах хугацаа:

Жил бүрийн 3-р сарын 1-ээс 3-р сарын 20-ны хооронд бүрэлдэхүүн сургуулийн сургалтын албанд бүртгүүлдэг.

Бүрдүүлэх бичиг баримт:

• Иргэний үнэмлэхний хуулбар
• 2 хувь зураг
• Цэргийн үүрэгтний үнэмлэхний хуулбар

Бүрэлдэхүүн сургуулийн сургалтын алба хөтөлбөрт хамрагдах оюутны бүртгэл мэдээллийг холбогдох материал болон хавсралтын хамт Оюутны хөгжил, үйлчилгээний албанд 3-р сарын 20-ны дотор ирүүлдэг.

Оюутны хөгжил, үйлчилгээний алба Оюутан цэрэг хөтөлбөрт хамрагдах оюутны холбогдох бичиг баримт болон албан бичиг хавсралтын хамт дүүргийн Цэргийн штабд хүргүүлдэг.

Дүүргийн цэргийн штаб оюутан цэрэг хөтөлбөрт хамрагдах оюутнуудын материалыг шалгаж БХЯ-нд хөтөлбөрт хамрагдах оюутны нэрсийг явуулдаг.

Оюутан цэрэг хөтөлбөрт хамрагдах хугацаа:

Оюутан цэрэг хөтөлбөрийн “Цэргийн ерөнхий бэлтгэл” хичээл 4-р сарын 1-ээс 6-р сарын 1 өдрийг хүртэл Бямба, ням гарагуудад 10-15 цагт ордог бөгөөд 6-р сарын 10-ны дотор Цэргийн штабын эрүүл мэндийн үзлэгт хамрагдаж үзлэгт тэнцсэн оюутан 6-р сарын 15-аас 8-р сарын 15-ны өдрийг хүртэл цэргийн тусгай бэлтгэлд хамрагдаж тангараг өргөснөөр оюутан цэргийн албыг хаасанд тооцдог.

ТТДС -ИЙН КАМПУС ДОТОРХ ОЮУТНЫ ҮЙЛЧИЛГЭЭ